繼續同史友們介紹我國最新嘅考古發現，近日雲南昆明「河泊所」嘅古滇國都城考古就有正式嘅結果公布，呢次重大發現亦都印證到古滇國都城嘅存在。
經過河泊所遺址考古隊以及雲南省文物考古研究所研究館共同考察之後，前前後後就喺河泊所遺址掘挖咗七個地點，面積足足達到7000平方公尺。經過遺址以及出土文物嘅考古研究之後，最終就判斷呢個地方以往就係古滇國嘅都邑，而遺址東部地區就係西漢益州郡郡治。
咁到底喺呢個遺址當中又有咩發現呢？考古團隊就先喺遺址當中清理出大型建築基址以及寬闊嘅道路。而喺出土嘅文物當中，就有廣受外界關注嘅封泥以及簡牘，經過清理之後就喺搵到包括「益州太守章」等官印封泥以及「宋虞之印」、「君馮私印」等私印封泥，同時仲有字跡清晰明顯、可以辨認到「滇池以亭行」、「建伶長」等字眼嘅簡牘殘片200餘片。呢啲發現都互相印證益州郡郡治就係位於發掘現場附近，同埋亦都反映西漢益州郡存在嚴謹嘅行政司法制度。
原圖嚟自網絡